Канаон
святой великомученице
Параскеве Глас 8
Песнь 1
Ирмос: Поим Господеви, проведшему люди Своя сквозе Чермное море, яко Един славно прославися.
Припев: Святая великомученице Параскево, моли Бога о нас.
Поим Господеви, прославльшему память мученицы, и приводящу земныя лики к похвалению днесь.
Славу презрела еси, о богатстве не радивши, честная мученице Параскево, на страсть себе вдала еси.
Слава Отцу и Сыну и Святому Духу.
Возжела Владыка твоея доброты, мученице, в Небесный Чертог всели тя.
И ныне и присно и во веки веков. Аминь.
Род Адамов паче ума блаженства Тобою рай отверст обретше, Богородице, достойно хвалим Тя.
Песнь 3
Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой.
Ты еси угверждение мое, глаголаше мученица, Ты же и заступление: и к Тебе прибегох, Царю мира.
Явилася еси на судищи, мужеумну душу имущи, и врага яко не храбра суща победиле еси всехвальная.
Слава Отцу и Сыну и Святому Духу.
Души моея зеницы исцели, всехвальная мученице, молитвами твоими, и ум мой управи.
И ныне и присно и во веки веков. Аминь.
Подаждь нам помощь молитвами Твоими, Пречистая, советы отревающи лютых обстояний.
Седален, глас 8
Ирмос: Кровей твоих струями, мученице Христова, потоки нечестия изсушивши, всехвальная Параскево, одождением же благодати словесныя напояеши бразды, в нихже прозябавши клас веры: к сему же славная и по смерти явилася еси, точа щи жизнь мучения ради. Страстотерпице всехвальная, моли Христа Бога даровати душам нашим велию милость.
Слава: ин седален, глас 4
Постом украсивши чистоту душевную, лучами страдания просвещаеши верныя, мученице многострадальная Параскево. Тем твой святый и светоносный день верою совершающе, благочестно вопием: яко имея дерзновение ко Господу, моли спастися нам.
И ныне: Богородичен
Обновила еси, Чистая, Божественным Рождеством Твоим истлевшее во страстех земнородных мертвенное существо, и воздвигла еси вся от смерти к жизни нетления. Темже Тя по долгу блажим вси, Дево Препрославленная, якоже прорекла еси.
Песнь 4
Ирмос: Услышах Господи смотрения Твоего таинство, разумех дела Твоя и прославих Твое Божество.
Услышавши, Господи, мученица Параскева заповеди Евангельския, прослави Твое Божество.
Не принесла еси отнюдь жертвы идолом мерзким, жертву живу себе Господеви вдала еси.
Слава Отцу и Сыну и Святому Духу.
Крепко на судищи ставши, вопияше мученица: со Христом Женихом моим распнуся и возцарствую с ним.
И ныне и присно и во веки веков. Аминь.
Очищение наших даруй согрешений, яко безгрешен, и умири люди Твоя яко Благ, молитвами Рождшия Тя.
Песнь 5
Ирмос: Утренююще вопием Ти: Господи спаси ны, Ты бо еси Бог наш, разве Тебе иного не вемы.
Утренюющи мученица вопияше Параскева: ничтоже мя разлучит любве Христовы.
Божественную мученицу мнев ослабети, смех сам явися пронырливый.
Слава Отцу и Сыну и Святому Духу.
Просвещение подаждь мне, всехвальная, и многомятежный мой ум просвети молитвами твоими.
И ныне и присно и во веки веков. Аминь.
Низложи непрестающую бурю страстей, Христа рождшая, Кормчию и Господа.
Песнь 6
Ирмос: Ризу мне подаждь светлу, одеяйся светом яко ризою, многомилостиве Христе Боже наш.
Ризою мя с небесе приодей, Господи, вопияше Параскева, Иже облаки небеса одеваяй, многомилостиве.
Якоже из рова Даниила услыша Господь, тако и тебе в темнице молящейся исцеление подавает.
Слава Отцу и Сыну и Святому Духу.
Мучителеву гордость низложила еси, сама же невредима пребывши, на муку дерзнула еси.
И ныне и присно и во веки веков. Аминь.
Слово божие Тя земным показа Небесную Лествицу: Тобою бо к нам сниде.
Кондак, глас 3
Всесвятое и непорочное мучение принесши, яко вено пречестное, безсмертному Жениху Христу, Ангельское ликостояние возвеселила еси и победила еси демонския козни: сего ради тя честно верою чтим, мученице Параскево многострадальная.
Икос
Кто изглаголет силы Господня? или кто повесть страдания твоя и добродетели, мученице? или кий язык воспети возможет по достоинству? Темже и аз недостойный воспети покушаюся, хвалити же и славити Владыку Жизнодавца, давшаго тебе на тризнищи крепость мучителей не убоятися исповедающей Истиннаго Бога. Сего ради тя чтим верою и любовию, мученице Параскево многострадальная.
Песнь 7
Ирмос: От Иудеи дошедше отроцы, в Вавилоне иногда верою Тройческою пламень пещный попраша, поюще: отцев Боже, благословен еси.
Явишася паче ума чудеса Божественныя мученицы, во юнотстве девства победи мучителя, зовущи: отец наших Боже, благословен еси.
Безстудных заградила еси богомерзская уста, среди су дища ставши, Бога исповедала еси взывающи: отец наших Боже, благословен еси.
Слава Отцу и Сыну и Святому Духу.
Забывши женскую немощь, мужественно укрепившися терпением, страждущи вопияла еси: отец наших Боже, благословен еси.
И ныне и присно и во веки веков. Аминь.
Из девическу боку воплощея, явился еси на спасение наше. Тем Твою Матерь ведуще Богородицу, благодарно взываем: отец наших Боже, благословен еси.
Песнь 8
Ирмос: Царя Небеснаго, Егоже поют вой Ангеьлстии, хвалите и превозносите во вся веки.
Царя Христа Бога, Егоже исповеда дева мученица Параскева, воспевающи, хвалите и превозносите во вся веки.
За любовь Божественныя Троицы огнь безбожия погасила еси, вопиющи: превозносите Христа во веки.
Слава Отцу и Сыну и Святому Духу.
Подвиги иже к Богу тьмы начальника низложила еси, поющи: превозносите Христа во веки.
И ныне и присно и во веки веков. Аминь.
Противных прилога на ны угаси искры, яко да поем Господа и превозносим Его во веки.
Песнь 9
Ирмос: Воистину Богородицу Тя исповедуем, спасеннии Тобою Дево Чистая, с безплотными лики Тя величающе.
Воистину тезоименита назвалася еси Параскево, подобящися страстем Христовым, с небесными воинствы ликующи.
Постигла еси конец мучения многими страстьми и болезньми твоими, со Ангелы Христа славящи на Небесех, всечестная.
Слава Отцу и Сыну и Святому Духу.
Дерзновение имущи ко Спасу и Владыце, моли за поющия твою память, мученице славная Параскево.
И ныне и присно и во веки веков. Аминь.
Песньми Тя поем, Богоблагодатная, и немолчно Тебе радуйся приносим: Ты бо источила еси всем нам веселие.
Светилен
Яко шипок краснейший от терновнаго прозябла еси корене, дево Параскево, оброшением, мученице, священнаго страдания обагрившися кровию, и ныне Божественную твою память творящия любовию спасай ны от бед.
Слава, и ныне:
Стояще окрест Тебе девы богомудрыя, Богородительнице Марие, яко Царице родом, Твоему Сыну приведошася невестолепно, Пречистая, яко Царю всяческих, Его же Мати Дево Отроковице, о нас моли.
<< ПРЕДЫДУЩАЯ СТРАНИЦА | СОДЕРЖАНИЕ | СЛЕДУЮЩАЯ СТРАНИЦА >>
